Тарих гувоҳ не ёвларга, метин бўлган қалқон учун,
Қанча қонлар дарё бўлиб қад кўтарган бўстон учун,
Не-не буюк аждодларим ҳоки ётган маскан учун,
Шукур қилмоқ керак дўстим, бу бебаҳо Ватан учун!
Қанча кимса мусофирлик азобидан дили ғариб,
Ҳаловат йўқ кунларида, яшаб юрар минг бор ҳориб.
Ватан нима, Ватан недур сўранг ундан бир бориб,
Шукур қилмоқ керак дўстим, бу бебаҳо Ватан учун!
Боболаринг яшаб келган, ҳовли жойинг бор уйинг,
Бу манзилда ўтди ёшлик, гувоҳ бўлиб кўп тўйинг,
Қайда бўлма ўз бағрига чорлар Ватан, йўқ ўйинг,
Шукур қилмоқ керак дўстим, бу бебаҳо Ватан учун!
Ватан менга не берди деб, шайтон сўзга учма дўст,
Ватан сени болам деди, хом-хаёллар қучма дўст.
Асли ўзинг нелар қилдинг, обдон ўйла, ўйла дўст,
Шукур қилмоқ керак дўстим бу бебаҳо Ватан учун!