Ҳар йилгидек гўзал анъана,
Ёшу-қари жамулжам яна,
Барча бирдек кутар тантана,
Йил рақами ўзгарар сана.
Ачинмаймиз ўтган умрга,
Келар йилдан кутганча умид.
Бугун қувонч уммони чексиз,
Ҳеч бир одам эмас ноумид.
Безатилиб арча давлати,
Хуш кайфият берар савлати.
Келар дея Қорқиз, Қорбобо
Дастурхонда дунё неъмати.
Ҳар гўдакнинг қўлида совға,
Тунда келиб Қорбобо берган.
Шеър айтмоқчи эди бир талай,
Кутиб ҳориб, уйқуни урган.
Эртак эмас, келар янги йил
Ҳар одамга берар ҳаяжон.
Ахир ёшга яна ёш қўшиб,
Вақт эслатиб қўяр ногаҳон.
Кулиб, шодон Янги йил кутиш,
Ҳар кимсага айласин насиб.
Гувоҳ бўлиб кўплаб рақамга,
Совға излаб юрайлик шошиб.